Mae hwn yn gyfnod cyffrous i bobl ifanc Cymru. Bydd y Cwricwlwm newydd i Gymru yn cael ei gyflwyno ym mis Medi 2022.
CRYNODEB – CWRICWLWM I GYMRU
Mae ein cwricwlwm wedi’i gyd-greu drwy ymgysylltu â’r holl randdeiliaid a bydd yn bodloni’r gofynion canlynol:
Ein gweledigaeth:
Bydd ein Cwricwlwm yn anelu at ddatblygu ac ysbrydoli pob dysgwr i fod yn:
> Dysgwyr uchelgeisiol, galluog,
> Dinasyddion Moesol, Gwybodus
> Cyfranwyr Mentrus, Creadigol
> Unigolion Iach, Hyderus
Bydd ein cwricwlwm yn ystyried ein cynefin a’n gwerthoedd fel cymuned gyda Lles a datblygiad Llythrennedd, Rhifedd a Chymhwysedd Digidol yn ganolog iddo. Bydd profiadau dysgu yn ysbrydoli dysgwyr ac yn cynnwys cyfleoedd ymarferol ‘a fydd yn galluogi dysgwyr i ddysgu mewn ffordd ystyrlon sy’n adlewyrchu eu diddordeb a’u hanghenion. Byddwn yn anelu at roi cyfleoedd i ddysgwyr ddatblygu sgiliau ac i archwilio syniadau a chaniatáu iddynt adeiladu eu gwybodaeth a’u dealltwriaeth trwy bynciau a fydd yn dal eu diddordeb ac yn ysgogi eu dychymyg.
Yn Ysgol Llanybydder rydym yn awyddus i ddatblygu sgiliau personol a chymdeithasol cryf yn ein dysgwyr fel y gallant weithio gyda’i gilydd yn effeithiol a chydnabod a deall teimladau a hawliau pobl eraill. Ein nod yw datblygu dysgwyr sydd yn; hapus, iach, cwrtais, hyderus, a pharchus tuag at eraill.
Bydd ein cwricwlwm yn datblygu dinasyddion da ac yn arfogi ein holl bobl ifanc â’r wybodaeth, y sgiliau a’r agweddau ar gyfer heriau’r dyfodol fel dysgwyr gydol oes.
Ein gwerthoedd
- Parch ac Ymddiriedaeth
- Cymuned a Chynefin
- Lles a Gofal
- Hapusrwydd a Mwynhad
- Gwydnwch a Hyder
- Cymru a Chymreictod
- Mentro ac Arloesi
- Cefnogaeth a Chydweithio
Ein cwricwlwm cynhwysol
Bydd ein cwricwlwm yn codi dyheadau pob dysgwr. Fel ysgol rydym wedi ystyried sut y bydd pob dysgwr yn cael ei gefnogi i wireddu’r pedwar diben ac i symud ymlaen. Rydym wedi ystyried ein darpariaeth ADY a sut y byddwn yn bodloni anghenion gwahanol grwpiau o ddysgwyr.
Y pedwar diben
Y pedwar diben yw’r man cychwyn a’r dyhead ar gyfer ein cynllun cwricwlwm ysgol. Nod ein hysgol yw cefnogi ein dysgwyr i ddod :
> yn ddysgwyr uchelgeisiol, galluog, sy’n barod i ddysgu drwy gydol eu hoes
> yn gyfranwyr mentrus, creadigol, yn barod i chwarae rhan lawn mewn bywyd a gwaith
> dinasyddion egwyddorol, gwybodus Cymru a’r byd
> unigolion iach, hyderus, sy’n barod i fyw bywydau boddhaus fel aelodau gwerthfawr o gymdeithas
Y datganiadau o’r hyn sy’n bwysig
Bydd ein cwricwlwm yn darparu cyfleoedd a phrofiadau i ddatblygu’r cysyniadau, gwybodaeth a sgiliau allweddol fel y’u disgrifir yn y datganiadau o’r hyn sy’n bwysig ac yn unol â’r Cod Datganiadau o’r Hyn sy’n Bwysig.
Meysydd Dysgu a Phrofiad
Bydd ein cwricwlwm yn darparu profiadau dysgu drwy’r 6 Maes Dysgu a Phrofiad o:
- Ieithoedd, Llythrennedd a Chyfathrebu
- Celfyddydau Mynegiannol
- Gwyddoniaeth a Thechnoleg
- Dyniaethau
- Mathemateg a Rhifedd
- Iechyd a Lles
Dysgu, Dilyniant ac Asesu
Bydd ein cwricwlwm yn cefnogi dysgu trwy ddylunio cyfleoedd dysgu sy’n tynnu ar yr egwyddorion addysgegol.
Mae ein cwricwlwm, a ategir gan addysgu a dysgu effeithiol, yn galluogi dysgwyr i wneud cynnydd ystyrlon. Dros amser bydd ein dysgwyr yn datblygu a gwella eu sgiliau a’u gwybodaeth. Mae ein cwricwlwm yn canolbwyntio ar ddeall beth mae’n ei olygu i wneud cynnydd mewn Maes neu ddisgyblaeth benodol a sut y dylai dysgwyr ddyfnhau ac ehangu eu gwybodaeth a’u dealltwriaeth, eu sgiliau a’u galluoedd, a’u priodoleddau a’u tueddiadau, ac mae’n cael ei lywio gan y Cod Cynnydd. Mae hyn yn ei dro yn cefnogi ein hymagwedd at asesu, a’i ddiben yw llywio cynllunio ar gyfer dysgu yn y dyfodol. Bydd asesu yn cael ei wreiddio fel rhan gynhenid o ddysgu ac addysgu. Bydd pob dysgwr yn cael ei asesu ar fynediad i’r ysgol.
Cymraeg
- Mae ysgolion sy’n darparu addysg cyfrwng Cymraeg yn defnyddio’r Gymraeg i gyflwyno’r cwricwlwm. Cyflwynir gwersi Saesneg ym Mlwyddyn 3.
Sgiliau trawsgwricwlaidd
Bydd ein cwricwlwm yn datblygu sgiliau trawsgwricwlaidd gorfodol llythrennedd, rhifedd a chymhwysedd digidol. Bydd ein cwricwlwm yn galluogi dysgwyr i ddatblygu cymhwysedd a gallu yn y sgiliau hyn a’u hymestyn a’u cymhwyso ar draws pob Maes. Bydd dysgwyr yn cael cyfleoedd ar draws y cwricwlwm i:
- datblygu sgiliau gwrando, darllen, siarad ac ysgrifennu
- gallu defnyddio rhifau a datrys problemau mewn sefyllfaoedd go iawn
- bod yn ddefnyddwyr hyderus o ystod o dechnolegau i’w helpu i weithredu a chyfathrebu’n effeithiol a gwneud synnwyr o’r byd
CCUHP – Hawliau Plant
Bydd ein hysgol yn hyrwyddo gwybodaeth a dealltwriaeth o Ran 1 o CCUHP, ac o CCUHP, ymhlith y rhai sy’n darparu addysgu a dysgu.
CWRE : profiadau sy’n gysylltiedig â gyrfaoedd a gwaith
Bydd ein cwricwlwm yn ymgorffori gyrfaoedd a phrofiadau cysylltiedig â gwaith ar gyfer ein holl ddysgwyr.
Addysg Cydberthynas a Rhywioldeb ACRh
Mae ein cwricwlwm ysgol yn cofleidio’r arweiniad yn y Cod ACRh. Bydd gan ein darpariaeth Addysg Cydberthynas a Rhywioldeb rôl gadarnhaol a grymusol yn addysg ein dysgwyr a bydd yn chwarae rhan hanfodol wrth eu cefnogi i wireddu’r pedwar diben fel rhan o ymagwedd ysgol gyfan. Sylfaen ACRh yw helpu dysgwyr i ffurfio a chynnal ystod o berthnasoedd, i gyd yn seiliedig ar gyd-ymddiriedaeth a pharch. Mae’r perthnasoedd hyn yn hanfodol i ddatblygiad lles emosiynol, gwydnwch ac empathi.
CGM : Crefydd, Gwerthoedd a Moeseg
Mae crefydd, gwerthoedd a moeseg (CGM) yn ofyniad statudol o’r Cwricwlwm i Gymru ac mae’n orfodol i bob dysgwr rhwng 3 ac 16 oed.
Nid oes hawl gan riant i wneud cais i dynnu plentyn o wersi CGM yn y Cwricwlwm i Gymru
Gan fod CGM yn bwnc a bennir yn lleol, mae’r maes llafur cytûn yn nodi’r hyn y dylid ei addysgu mewn CGM o fewn yr awdurdod lleol a bydd ein cwricwlwm yn adlewyrchu’r canllawiau hyn.
Adolygu a mireinio
Bydd ein cwricwlwm ysgol yn cael ei adolygu’n barhaus er mwyn ymateb i allbynnau ymholi proffesiynol, anghenion cyfnewidiol dysgwyr a chyd-destunau ac anghenion cymdeithasol. Bydd yr adolygiadau’n ystyried barn rhanddeiliaid ac yn cael eu cymeradwyo gan y Corff Llywodraethol. Byddwn yn cyhoeddi crynodeb o’n cwricwlwm ac yn adolygu’r crynodeb os gwneir newidiadau i’r cwricwlwm yn ystod y broses adolygu.
